జయపుర, డిసెంబర్ 31 (న్యూస్‌టైమ్)‌: సినీ దర్శకుడు ఎస్‌ఎస్‌ రాజమౌళి కుమారుడు కార్తికేయ వివాహం అంగరంగ వైభవంగా జరిగింది. రాజస్థాన్‌ రాజధాని జయపుర‌లోని ఓ ప్యాలెస్‌లో వీరి వివాహ వేడుకను నిర్వహించారు. ఆదివారం రాత్రి వరుడు కార్తికేయ, వధువు పూజా ప్రసాద్‌ వివాహ బంధంతో ఒక్కటయ్యారు. వేడుకకు రెండు రోజుల ముందే టాలీవుడ్ ప్రముఖులు ప్రభాస్‌, జూనియర్ ఎన్టీఆర్, రామ్‌చరణ్‌, ఉపాసన, అనుష్క, ఎంఎం కీరవాణి, జగపతిబాబు, రానా తదితరులు హాజరయ్యారు.

ముందస్తు పెళ్లి వేడుక నుంచి చివరి ఘట్టం వరకు తారక్‌, ప్రభాస్, చరణ్‌, రానా రాజమౌళి కుటుంబీకులతో కలిసి రచ్చ చేశారు. డ్యాన్సులతో సందడి చేశారు. కాగా, రాత్రి జరిగిన పెళ్లి వేడుకలో పెళ్లి కుమార్తె కూర్చున్న పల్లకిని ఆమె బంధువులతో పాటు ప్రభాస్‌ కూడా మోశారు. ప్రభాస్‌ పల్లకి మోస్తున్న వీడియో సోషల్‌ మీడియాలో వైరల్‌ అవుతోంది. వేడుకలో ప్రభాస్‌, అనుష్క సందడి చేస్తున్న వీడియోలు కూడా చక్కర్లు కొడుతున్నాయి. రాజమౌళి కుమారుడి పెళ్లి సందడి మొదలైనప్పటి నుంచి సామాజిక మాధ్యమాల్లో ‘బంంగారం సేయ్‌ఎస్ఎస్’ అనే హ్యాష్‌ ట్యాగ్‌ వైరల్‌ అవుతోంది.

అయితే, ఈ హ్యాష్‌ట్యాగ్‌ వెనక ఉన్న అర్థం ఏంటేంటే? కార్తికేయ తన భార్య పూజను బంగారం అని పిలుస్తారట. పూజ, కార్తికేయను ‘ఎస్ఎస్’ అని ఇంటి పేరుతో సంబోధిస్తారట. అందుకే శుభలేఖలోనూ ‘bangaram saysSS’ అనే హ్యాష్‌ట్యాగ్‌ను కూడా అచ్చువేయించినట్లు తెలుస్తోంది. మరోవైపు, యంగ్‌ టైగర్‌ ఎన్టీఆర్‌ ఎస్‌.ఎస్‌. రాజమౌళి కుమారుడు కార్తికేయ, పూజల పెళ్లి సంగీత్‌లో సందడి చేశారు.

ఇప్పటికే రామ్‌చరణ్‌, తారక్‌, ప్రభాస్‌ తదితరులు కలిసి సంగీత్‌లో డ్యాన్సులు చేసిన వీడియోలు బయటికి వచ్చాయి. కాగా తాజాగా తారక్‌ తన బాబాయి బాలకృష్ణను ఉద్దేశించి మాట్లాడుతుండగా తీసిన వీడియో ఒకటి వైరల్‌గా మారింది. ఇందులో అందరూ కలిసి ‘జై బాలయ్య జై బాలయ్య’ అని అరుస్తూ కనిపించారు. మిగిలిన వారు మౌనంగా ఉన్న సమయంలో ఎన్టీఆర్‌ ‘జై బాలయ్య’ అంటూ హంగామా చేశారు.

జయపురలో కార్తికేయ వివాహం జరుగుతున్న సంగతి తెలిసిందే. ఈ నేపథ్యంలో సినీ ప్రముఖులు అక్కడికి చేరుకున్నారు. శుక్రవారం ఘనంగా పెళ్లి పార్టీ ఏర్పాటు చేసిన విషయం తెలిసిందే. శనివారం మెహెందీ, సంగీత్‌ వేడుకల్ని నిర్వహించారు. ఆదివారం రాత్రి వివాహం జరిగింది. జగపతిబాబు సోదరుడు రాంప్రసాద్‌ కుమార్తె పూజతో కార్తికేయ పెళ్లి జరిగింది. ఈ ఏడాది నవంబరులో వీరి నిశ్చితార్థం జరిగింది.