అమరావతి, మే 17 (న్యూస్‌టైమ్): రాష్ట్రంలోని ఏడు నియోజకవర్గాల్లో 19 చోట్ల రీపోలింగ్ నిర్వహించాలంటూ తెలుగుదేశం పార్టీ నేతలు శుక్రవారం ఇచ్చిన ఫిర్యాదుపై ఆంధ్రప్రదేశ్ ప్రభుత్వ ప్రధాన కార్యదర్శి ఎల్వీ సుబ్రమణ్యం వెంటనే స్పందించారు. దీనిపై రాష్ట్ర ఎన్నికల ప్రధాన అధికారి (సీఈవో) కార్యాలయానికి తక్షణమే ఓ నోట్ పంపించాలని తన కార్యాలయ అధికారులకు సూచించారు. దీనిపై అప్రమత్తమైన సీఎస్ కార్యాలయం తెదేపా వినతి పత్రాన్ని పరిశీలించాలని సిఫార్సు చేస్తూ సీఈవోకు నోట్ పంపింది. వైఎస్సార్ కాంగ్రెస్ పార్టీ నేత చెవిరెడ్డి భాస్కర్‌ రెడ్డి ఫిర్యాదు తరహాలోనే తెలుగుదేశం పార్టీ ఫిర్యాదుపైనా స్పందించినట్టు అనంతరం సీఎస్ కార్యాలయం వెల్లడించింది.

ఏడు అసెంబ్లీ నియోజకవర్గాల పరిధిలో 19 చోట్ల రీపోలింగ్ జరపాలని డిమాండ్‌ చేస్తూ తెదేపా మంత్రులు దేవినేని ఉమామహేశ్వరరావు, కొల్లు రవీంద్ర, నక్కా ఆనంద్‌బాబు, కేఎస్ జవహర్ సహా ఎమ్మెల్యేలు, ఎమ్మెల్సీలు సీఎస్‌ను కలిసి వినతిపత్రం ఇచ్చారు. తమ విజ్ఞాపన పత్రాన్ని కూడా సీఈసీకి పంపుతూ రీపోలింగ్‌కు సిఫార్సు చేయాలని సీఎస్‌ను డిమాండ్ చేశారు. ఏడు నియోజకవర్గాల పరిధిలో 19 చోట్ల రీపోలింగ్‌ కోసం గతంలోనే ఈసీఐని కోరినట్టు మంత్రి నక్కా ఆనందబాబు వెల్లడించారు. వైకాపా చేస్తున్న ఫిర్యాదులపై ఆగమేఘాలపై స్పందిస్తున్న ఈసీ తాము ఇచ్చిన ఫిర్యాదులను మాత్రం బుట్టదాఖలు చేస్తోందని ఆరోపించారు. ముందుగానే ఈసీతో మాట్లాడుకుని సీఎస్‌కు వైకాపా ఫిర్యాదు చేస్తున్నట్టు కనిపిస్తోందని అనుమానం వ్యక్తంచేశారు. దశలవారీగా రీపోలింగ్‌ జరిపిన దాఖలాలు ఎక్కడా లేవని మంత్రి వ్యాఖ్యానించారు. తమ విజ్ఞప్తిని సైతం సీఈసీకి పంపాలని సీఎస్‌ను కోరినట్టు మంత్రి చెప్పారు.

కాగా, గుంటూరు జిల్లా నరసరావుపేట నియోజకవర్గంలోని ఉప్పలపాడులో 214, 215 పోలింగ్ కేంద్రాల్లో రీపోలింగ్‌కు డిమాండ్ చేశారు. కడప జిల్లా రాజంపేటలోని 78, 130, 131, 132 పోలింగ్ కేంద్రాల్లోనూ, చిత్తూరు జిల్లా కోడూరులో 21, 244, సత్యవేడులో 80, 81, కడప జిల్లా జమ్మలమడుగులో 287, 288, గుంటూరు జిల్లా సత్తెనపల్లిలోని 160, 161, 162 , చిత్తూరు జిల్లా చంద్రగిరిలో 310, 311, 323 పోలింగ్ కేంద్రాల్లో రీపోలింగ్ నిర్వహించాలని తెదేపా నేతలు డిమాండ్‌ చేశారు.

LEAVE A REPLY

Please enter your comment!
Please enter your name here