న్యూఢిల్లీ, మే 27 (న్యూస్‌టైమ్): ప్రభుత్వ రంగ విద్యుదుత్పాదక దిగ్గజం ఎన్టీపీసీ స్టాండలోన్ నికర లాభం భారీగా పుంజుకుంది. గత ఆర్థిక సంవత్సరం (2018-19) చివరి త్రైమాసికం లేదా ఈ ఏడాది జనవరి-మార్చి వ్యవధిలో రూ.4,350.32 కోట్లుగా నమోదైంది. అంతకుముందు ఆర్థిక సంవత్సరం (2017-18) ఇదే కాలంలో రూ.2,925. 59 కోట్లుగానే ఉందని ఒక ప్రకటనలో ఎన్టీపీసీ తెలియజేసింది. దీంతో ఈసారి 48.7 శాతం లాభాలు పెరిగాయని పేర్కొంది. అయితే, ఆదాయం గతంతో పోల్చితే రూ.23,617.83 కోట్ల నుంచి రూ.22,545.61 కోట్లకు పడిపోయింది. ఈ క్రమంలో సంస్థాగత వ్యయం కూడా రూ.19,008.44 కోట్లకు పరిమితమైంది. నిరుడు రూ.20,229.26 కోట్లుగా ఉండటం గమనార్హం.

దీంతో రూ.1,221 కోట్ల మేర తగ్గిన ఈ వ్యయభారం సంస్థ లాభాల పురోగతికి దోహదం చేసింది. ఇదిలావుంటే మొత్తం గత 2018-19 ఆర్థిక సంవత్సరంలో సంస్థ స్టాండలోన్ నికర లాభం 13.60 శాతం ఎగిసి రూ. 11,749.89 కోట్లను తాకింది. 2017-18లో ఇది రూ.10,343.17 కోట్లుగా ఉంది. ఆదాయం కూడా రూ.85,207.95 కోట్ల నుంచి రూ.92,179.56 కోట్లకు పెరిగింది. ఏకీకృత నికర లాభం విషయానికొస్తే 2017-18లో రూ.10,501.50 కోట్లుగా ఉంటే, 2018-19లో రూ. 12,633.45 కోట్లకు ఎగబాకింది. ఆదాయం రూ.89,641.59 కోట్ల నుంచి రూ.97,537.34 కోట్లకు పెరిగింది.

కాగా, గత ఆర్థిక సంవత్సరానికి (2018-19)గాను 25 శాతం తుది డివిడెండ్‌కు ఎన్టీపీసీ బోర్డ్ ఆఫ్ డైరెక్టర్లు సిఫార్సు చేశారు. రూ.10 ముఖ విలువ కలిగిన ప్రతీ ఈక్విటీ షేర్‌కు రూ.2.50ను ప్రకటించారు. ఆగస్టులో జరిగే సంస్థ వార్షిక సాధారణ సమావేశంలో వాటాదారుల ఆమోదానికి లోబడి ఈ డివిడెండ్ ఉండనుంది. ఇప్పటికే ఒక్కో ఈక్విటీ షేర్‌కు రూ.3.58 మధ్యంతర డివిడెండ్‌ను సంస్థ ప్రకటించిన విషయం తెలిసిందే. ఫిబ్రవరిలోనే ఈ చెల్లింపులు జరిగిపోగా, దానికి ఈ తుది డివిడెండ్ అదనం కానుంది.

కాగా, ఎన్టీపీసీ డివిడెండ్‌లను చెల్లించడం వరుసగా ఇది 26వ సంవత్సరం కావడం గమనార్హం. 2018-19లో 305.90 బిలియన్ యూనిట్ల విద్యుదుత్పత్తిని ఎన్టీపీసీ చేసింది. 2017-18లో ఇది 294.27 బిలియన్ యూనిట్లుగానే ఉంది. ఎన్టీపీసీ గ్రూప్ మొత్తం విద్యుదుత్పాదక సామర్థ్యం ఈ మార్చి 31 నాటికి 55,126 మెగావాట్లుగా, నిరుడు మార్చి ఆఖరుకు రూ.53,651 మెగావాట్లుగా ఉంది.

1 COMMENT

  1. I absolutely love your site.. Great colors
    & theme. Did you make this amazing site yourself?
    Please reply back as I’m hoping to create my own personal website and want to find
    out where you got this from or just what the theme is called.
    Many thanks!

LEAVE A REPLY

Please enter your comment!
Please enter your name here