• ‘సైరా’తో సరిపెట్టారా? ఇంకేమైనా…

అమరావతి, అక్టోబర్ 14 (న్యూస్‌టైమ్): ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డిని మెగాస్టార్‌ కె. చిరంజీవి దంపతులు మర్యాదపూర్వకంగా కలిశారు. సోమవారం మధ్యాహ్నం హైదరాబాద్‌ నుంచి ప్రత్యేక విమానంలో విజయవాడకి చేరుకున్న చిరంజీవి తన భార్య సురేఖతో కలిసి గుంటూరు జిల్లా తాడేపల్లిలోని సీఎం జగన్‌ నివాసానికి వెళ్లారు. ఈ సందర్భంగా సీఎం జగన్‌ వారిని సాదరంగా ఆహ్వానించారు. వైఎస్‌ జగన్‌ ముఖ్యమంత్రి అయ్యాక చిరంజీతో భేటీ కావడం ఇదే తొలిసారి.

ఈనెల 5న తెలంగాణ గవర్నర్‌ తమిళసై సౌందరరాజన్‌ను చిరం‍జీవి మర్యాదపూర్వకంగా కలిసిన సంగతి తెలిసిందే. ‘సైరా నరసింహారెడ్డి’ సినిమా చూడాలని ఆమెను చిరంజీవి కోరారు. చిరంజీవి ఆహ్వానం మేరకు గవర్నర్‌ ప్రత్యేకంగా ఈ సినిమాను వీక్షించారు. తొలి స్వాతంత్ర్య సమరయోధుడు ఉయ్యాలవాడ నరసింహారెడ్డి కథ ఆధారంగా తెరకెక్కిన ‘సైరా నరసింహారెడ్డి’ సినిమా ఈనెల 2న విడుదలై బాక్సాఫీస్‌ వద్ద సందడి చేస్తోంది. ప్రేక్షకుల నుంచి మంచి స్పందన రావడంతో భారీ వసూళ్లు సాధించింది. సినిమా హిట్‌ కావడంతో మెగా ఫ్యామిలీతో పాటు అభిమానులు పండగ చేసుకుంటున్నారు.

మరోవైపు, తన ఇంటికి సతీసమేతంగా తొలిసారి వచ్చిన చిరంజీవిని జగన్‌ను సత్కారించారు. అయితే, ఈ భేటీ కేవలం ‘సైరా’ సినిమా వరకే పరిమితమయిందా? లేక ఇతర రాజకీయాలేమయినా చర్చకు వచ్చాయా? అన్నది ఇప్పుడు ఏపీలో హాట్‌ టాపిక్‌గా మారింది. ఒక వైపు జనసేనాని, చిరంజీవి సోదరుడు పవన్‌ కల్యాణ్ సీఎం జగన్‌పై అనేక ఆరోపణలు గుప్పిస్తున్న తరుణంలో చిరు-జగన్‌ భేటీ ఇటు రాజకీయ వర్గాలను కూడా ఆలోచనలో పడేసింది.